Либанскиот премиер Наџиб Микати изјави вчера, по разговорите со високиот претставник на ЕУ за надворешна политика и безбедност Жозеп Борел, дека смртоносниот израелски напад врз воениот центар во градот Ал-Амири, во јужен Либан, покажува дека Тел Авив не сака прекин на огнот.
„Пораките на непријателот на Израел, отфрлајќи секакво решение, продолжуваат и се напишани со либанска крв, во дрско отфрлање на решението за кое се разговара“, рече Микати во објавата на мрежата Х.
Тој ги повика земјите од светот и меѓународните институции да реагираат и ја изрази посветеноста на Либан за спроведување на резолуцијата 1701, со која се наложува либанската армија и мировните сили на ОН да бидат единственото воено присуство на границата меѓу Либан и Израел, пишува Ројтерс.
Во Бејрут, Борел повика да се изврши притисок и врз израелската влада и врз либанскиот Хезболах да го прифатат американскиот предлог за прекин на огнот.
Говорејќи на прес-конференција во Бејрут, Борел ги повика и либанските лидери да изберат претседател за да се стави крај на двегодишниот вакуум на власта во земјата, објави Ројтерс.
Тој вети 200 милиони евра за поддршка на либанските вооружени сили.
Израелскиот премиер Бенјамин Нетанјаху ги осуди еврејските доселеници кои нападнаа високи израелски воени офицери, вклучително и генерал-мајор Ави Блут, шеф на Централната команда на израелската армија на окупираниот Западен Брег.
Израелската војска соопшти дека група доселеници го следеле Блут и другите офицери во градот Хеброн на Западниот Брег во петокот, го блокирале нивниот излез и ги малтретирале, објави Ројтерс.
Армијата додаде дека се уапсени петмина демонстранти.
„Насилството насочено против офицери и војници на ИДФ мора да се постапи во целосна согласност со законот“, соопштија од кабинетот на премиерот.
Поединци од толпата му извикуваа на Блут, кој беше во посета на Хеброн за да присуствува на годишен верски настан во градот, дека е предавник.
Десетици доселеници, од кои некои беа маскирани, завчера фрлаа камења врз израелските војници и граничната полиција во близина на населбата Итамар на Западниот брег, соопшти полицијата.
Хезболах за првпат изврши напад со дрон врз поморската база Ашдод во јужен Израел, се вели во соопштението на либанската вооружена група.
Групата соопшти дека „извршила воздушен напад за прв пат користејќи повеќе ударни беспилотни летала врз поморската база Ашдод“, објави Ал Џезира.
Десетици илјади раселени Палестинци во Газа се соочуваат со уште полоши услови бидејќи обилните дождови предизвикаа голема штета на нивните импровизирани засолништа.
Дождот ги поплави шаторите кои беа поставени како привремено сместување за семејствата веќе раселени од израелските воздушни напади и бомбардирања, објави Вафа.
Спасувачките тимови пријавија значителна штета на шаторите во неколку области низ Појасот Газа, особено во бегалскиот камп на стадионот Јармук, општинскиот парк во градот Газа и бегалскиот камп Ал Шати.