Претседателот на Чешката Република Петр Павел се надева дека одлучноста и „неодоливиот стил“ на новоизбраниот американски претседател Доналд Трамп може да помогне да се принуди претседателот на Русија Владимир Путин да направи отстапки и да отвори простор за дипломатија во војната во Украина, иако патот до мирот ќе биде долг и тоа е невозможно да се постигне за 24 часа.
„Доколку директниот контакт на Доналд Трамп со Владимир Путин доведе до тоа Русија да биде поподготвена да направи отстапки и да ѝ даде простор на дипломатијата, тогаш тоа ќе биде голем чекор напред“, рече Павел во интервју за чешкиот таблоид Блеск.
Тој оцени дека би било вредно да се запре војната дури и по цена на неправеден мир, на пример според сценариото на тимот на Трамп за демилитаризирана зона долж сегашната линија на фронтот.
„Со право на праведен мир, значи не оној што ќе го награди агресорот, можеби не на денот кога примирјето ќе стапи на сила, туку да создаде можност во иднина да се врати меѓународното право – односно територијалниот интегритет и суверенитет на Украина на целата нејзина територија“, рече тој.
Чешкиот претседател рече дека предуслов е двете завојувани страни прво да почнат да преговараат, а потоа воопшто да прифатат решение.
„Сметам дека прво е потребна волјата на завојуваните страни за да се започнат преговорите, па дури потоа може да се зборува како да се постигне мир, бидејќи патот до мирот секако ќе биде долг и нема да може да се заврши за 24 часа“, рече Павел.
Во интервјуто што денеска го објави Блеск, претседателот на Чешка потсети дека додека украинскиот претседател Зеленски зборува за подготвеност за преговори, Русија го извршува најголемиот воздушен напад досега, чија цел е првенствено инфраструктура, односно цивилни цели.
„Намерата е да се парализира Украина како земја која успева да ги обезбеди потребите за живот на своето население и на тој начин да ја принуди да се согласи на мир под какви било услови“, рече Павел.
Чешкиот претседател, исто така, изрази страв од првите потези и назначувањето на клучни луѓе во идната американска администрација и предупреди дека тоа води до пресврт и нестабилност, што не е добро за безбедноста во светот, а исто така се покажало дека бизнис стилот во политиката, напорот да се води државата како компанија, едноставно не функционира.
„Секоја промена што не носи еволуција туку револуција предизвикува страв. Некои од изјавите на Трамп, на пр. во врска со одбраната, како ќе бидат сменети речиси сите генерали бидејќи не одговараат на идеите на новата администрација, имаат карактеристики на револуција“, рече чешкиот претседател.
Павел предупреди дека светот во оваа геополитичка ситуација не може да си дозволи такви земјотреси кои предизвикуваат нестабилност.