Австриската владејачка коалиција се согласи да го прекине снабдувањето со руски гас до 2027 година и го вклучи во новата безбедносна стратегија на земјата, пишува весникот Куриер.
Прашањето во моментов е во фаза на финализирање, забележува весникот, пренесува Moscow Times.
Една од причините зошто Австрија реши да се откаже од рускиот гас е тоа што парите што Москва ги добива од продажбата на гориво се користат за финансирање на конфликтот во Украина.
Австриската влада исто така смета дека зависноста од рускиот гас ја загрозува австриската економија.
Според последните проценки, природниот гас од Русија сочинува 80-90 отсто од вкупното количество гас во австриските гасоводи.
Виена минатата година му плати на Гаспром четири милијарди евра, посочува изданието.
Австриската министерка за енергетика Леоноре Гевеслер во февруари најави дека има намера да ја разгледа можноста за излегување од долгорочните договори меѓу австриската нафтена и гасна компанија ОМВ и Гаспром, кои важат до 2040 година.
Подоцна, ОМВ истакна дека, доколку е потребно, компанијата ќе може да ги снабдува австриските потрошувачи со 100 отсто гас од неруски извори, но за да се одбие горивото од Русија, ќе биде неопходно да се создаде соодветна правна основа.