Иран организирал напади врз француската брза железничка мрежа, парализирајќи го сообраќајот пред почетокот на Летните олимписки игри 2024 година во Париз, изјави во петокот израелскиот министер за надворешни работи, Израел Кац.
„Саботажата на железничката инфраструктура низ Франција пред Олимпијадата во Париз во 2024 година беше планирана и изведена под влијание на иранската оска на злото и радикалниот ислам“, напиша Кац на мрежата Икс, според Раша тудеј.
Кац додаде дека го предупредил францускиот министер за надворешни работи Стефан Сежур дека „врз основа на информациите што ги има Израел, Иранците планираат терористички напади против израелската делегација и сите учесници на Олимпијадата“.
„Мора да се преземат засилени превентивни мерки за да се спречи нивниот заговор“, напиша тој.
Францускиот национален железнички оператор SNCF во петокот соопшти дека сигналните кутии долж линиите што го поврзуваат Париз со неколку големи градови, вклучувајќи ги Лил, Бордо и Стразбур, биле запалени.
„Масовниот напад“ го попречи сообраќајот пред Игрите и доведе до одложувања и откажувања на полетувања, што влијаеше на 800.000 патници во текот на викендот, соопшти операторот.
Францускиот премиер Габриел Атал во петокот изјави дека „актите на саботажа врз објектите на SNCF биле извршени на планиран и координиран начин“.
Тој на X напиша дека разузнавачките агенции и полицијата се мобилизирани да ги пронајдат сторителите.