Израелскиот премиер Бенјамин Нетанјаху им рекол на семејствата на заложниците во Газа дека може да се постигне договор за ослободување на нивните најблиски, соопшти неговиот кабинет во вторникот.
– Условите очигледно созреваат. Ова е добар знак – им порача Нетанјаху на семејствата во понеделникот во Вашингтон, каде што треба да се сретне со американскиот претседател Џо Бајден оваа недела по обраќањето во Конгресот.
Напорите за постигнување договор за прекин на огнот во Газа, наведен од Бајден во мај и со посредство на Египет и Катар, добија импулс во текот на изминатиот месец.
Во петокот, американскиот државен секретар Ентони Блинкен рече дека преговарачите „возат кон целта“.
Руби Чен, татко на двојниот американско-израелски државјанин Итаи Чен, војникот чие тело е во Газа, беше еден од членовите на семејството кои се сретнаа со Нетанјаху.
– Рече дека условите созреваат, но јас го земам со резерва – изјави Чен за израелското воено радио.
Чен рече дека се надева оти Бајден, кој ја повлече својата кандидатура за реизбор и ја поддржа потпретседателката Камала Харис како демократски кандидат на изборите во ноември, ќе изврши поголем притисок врз Нетанјаху да обезбеди договор.
Борците на Хамас го нападнаа Израел на 7 октомври, убивајќи 1.200 луѓе и зедоа околу 250 заложници, според израелските податоци.
Хамас и другите групи сè уште држат 120 заложници, од кои околу една третина беа прогласени за мртви во отсуство од страна на израелските власти.
Според здравствените власти во Газа, енклавата управувана од Хамас, бројот на загинати Палестинци од израелската одмаздничка офанзива оттогаш достигна повеќе од 39.000.
Повеќе од 105 заложници беа ослободени во еднонеделното примирје во ноември, во замена за 240 палестински затвореници, пренесува Ројтерс.