„Одлуката на Соединетите Американски Држави да распоредат оружје со долг дострел во Германија води кон студена војна“, изјави портпаролот на Кремљ, Дмитриј Песков.
„Преземаме сигурни чекори кон Студената војна, сето тоа веќе се случи“, рече Песков во разговорот воден од новинарот Павел Зарубин, објавен на каналот Телеграм на новинарот, пренесува РИА Новости.
Заменик-министерот за надворешни работи на Русија Сергеј Рјабков претходно денеска изјави дека одлуката на Соединетите Американски Држави да распоредат ракети со долг дострел во Германија нема да ја принуди Русија да влезе во скапа трка во вооружување, пренесува Танјуг.
Пентагон во средата објави дека САД ќе почнат да распоредуваат оружје со долг дострел на германска територија од 2026 година.
Станува збор за противвоздушни системи СМ-6, крстосувачки ракети Томахавк и хиперсонично оружје.
Германскиот министер за одбрана Борис Писториус денеска изјави дека САД ќе распоредат системи со долг дострел во Германија на ротациона основа и истакна дека одлуката на Вашингтон „ќе го затвори сериозен јаз во способностите во Европа“.