Руди Џулијани, поранешниот адвокат на Доналд Трамп, поднесе барање за стечај, неколку дена откако му беше наложено да плати 148 милиони долари во тужбата за клевета, поднесена од двајца поранешни изборни работници во американската сојузна држава Џорџија.
Тие тврдеа дека неговите лажни обвинувања против нив за помагање во местењето на изборите против поранешниот претседател доведоа до смртни закани што ги натера да се плашат за своите животи.
Во своето поднесување во четвртокот, поранешниот градоначалник на Њујорк наведе скоро 153 милиони долари постојни или потенцијални долгови, вклучително и скоро 1 милион долари даночни обврски, пари што им ги должи на своите адвокати и милиони долари потенцијални правни пресуди од други тужби против него.
Тој процени дека неговиот имот вреди меѓу 1 и 10 милиони долари.
Најголем долг е оној од 148 милиони долари што му беше наложено да го плати пред една недела.
Тед Гудман, политички советник и портпарол на Џулијани, поранешен републикански претседателски кандидат и висок функционер во Министерството за правда, рече дека овој потег „не треба да биде изненадување за никого“.
„Ниту еден човек не можеше разумно да верува дека градоначалникот Џулијани ќе може да плати толку голема казна“, рече Гудман.
Тој додаде дека барањето за стечај ќе му даде на Џулијани „можност и време да поднесе жалба, истовремено обезбедувајќи транспарентност за неговите финансии под надзор на стечајниот суд, за да се осигура дека сите доверители се третираат еднакво и правично во текот на целиот процес“.
Сепак, барањето за стечај веројатно нема да ги избрише побарувањата од 148 милиони долари што поротата им ја додели на поранешните работнички во кампањата Вандра „Шеј“ Мос и нејзината мајка Руби Фримен.
Законот за банките не дозволува отпишување на долгови кои произлегуваат од „свесна и злонамерна повреда“ предизвикана на друг.
Минатонеделната пресуда на поротата беше најновиот и најскапиот знак за зголемените финансиски проблеми на Џулијани, влошени со истраги, тужби, парични казни, санкции и штети поврзани со неговата помош на тогашниот републикански претседател Трамп во обидот да ги поништи изборите во 2020 година што ги загуби од демократот Џо Бајден.
Во септември, поранешниот адвокат на Џулијани, Роберт Костело го тужеше за околу 1,4 милиони долари неплатени правни сметки, тврдејќи дека го прекршил договорот со тоа што не ги платил сметките целосно и навреме.
Џулијани побара од судијата да го отфрли случајот, тврдејќи дека никогаш не ги добил спорните фактури. Случајот е во тек.
Костело го застапуваше Џулијани од ноември 2019 до јули 2023 година во низа прашања кои се движат од истрага за неговите зделки во Украина, што резултираше со рација на ФБИ во неговиот дом и канцеларија во април 2021 година, до државни и федерални истраги за неговата работа по поразот на Трамп на изборите во 2020 година.
Во август, УЈП соопшти дека Џулијани должи 549.435 долари само за даночната 2021 година.
Џулијани, кој останува малку популарен меѓу конзервативците во градот со кој некогаш управуваше, води дневна радио емисија во неговиот роден град на станица во сопственост на локален републикански магнат од прехранбената индустрија.
Тој, исто така, води и ноќно стриминг шоу кое го гледаат неколку стотици луѓе на социјалните мрежи, што тој го нарекува „Американски градоначалник во живо“.