Според портпаролот на израелските одбранбени сили, Џонатан Конрикус, односот на двајца палестински цивили убиени во Газа за секој милитант на Хамас е „исклучително добар“ со оглед на тоа што борбите се водат во урбаните области.
Изјавата уследи по тврдењата на медиумите во понеделникот, цитирајќи високи израелски воени претставници, дека во Газа се убиени двајца цивили за секој милитант на Хамас, според Си-Ен-Ен.
Портпаролот на армијата, потполковник Конрикус, во понеделникот изјави за американската телевизија дека може да го потврди медиумскиот извештај.
„И можам да кажам дека ако тоа е вистина, и мислам дека нашите бројки ќе го потврдат тоа – ако го споредите тој однос со кој било друг конфликт на урбан терен меѓу војската и терористичката организација која користи цивили како свој жив штит и е имплементирана кај цивилното население ќе видите дека оваа скала е многу голема, исклучително позитивна и можеби единствена во светот“, нагласи Конрикус.
Израелскиот министер за одбрана Јоав Галант изјави за новинарите на прес-конференција во саботата дека војската убила „илјадници терористи“, според Си-Ен-Ен.
Министерството за здравство во Газа, кое е под контрола на Хамас, во понеделникот соопшти дека од 7 октомври во израелските напади се убиени 15.899 Палестинци, без да прецизира колку цивили и борци се убиени, пренесува Танјуг.