Висок функционер на Хамас одби да признае дека неговата група убила цивили во Израел, тврдејќи дека цел биле само војници и регрути.
Муса Абу Марзук за Би-Би-Си изјави дека „жените, децата и цивилите се ослободени“ од нападите на Хамас.
Неговите тврдења се во целосна спротивност со обилните видео докази за членовите на палестинската екстремистичка група кои пукаат во невооружени луѓе, вклучително и деца.
Израел вели дека Хамас уби повеќе од 1.400 луѓе, главно цивили, и киднапираше околу 240 луѓе во нападите на 7 октомври.
Марзук, заменик-шефот на политичкото крило на Хамас, чиј имот е замрзнат во Велика Британија, според прописите за борба против тероризмот, беше интервјуиран во Заливот во саботата.
Тој е најстариот член на Хамас кој бил интервјуиран од Би-Би-Си од злосторството на 7 октомври.
Би-Би-Си инсистираше Марзук да одговори на некои прашања за војната во Газа, особено поради многуте заложници што Хамас ги држи во Појасот Газа, за кои се верува дека се наоѓаат во огромна мрежа од тунели.
Марзук вели дека заложниците не можат да бидат ослободени додека Израел ја бомбардира Газа.
Министерството за здравство со кое раководи Хамас тврди дека повеќе од 10.000 луѓе се убиени откако израелската армија започна со операции минатиот месец како одмазда за претходниот упад на Хамас во јужен Израел.
„Ќе ги ослободиме. Но, прво, борбите мора да се прекинат и да ги предадеме на Црвениот крст“, рече тој.
Марзук неодамна ја посети Москва, каде една од темите на разговор беа осумте руско-израелски двојни државјани кои беа киднапирани од Хамас на 7 октомври.
Многу земји, пред се САД и Велика Британија, го прогласија Хамас за терористичка организација.
Марзук рече дека членовите на Хамас „пребарале и пронашле две жени“ од Русија меѓу заложниците во Газа, но не можеле да ги ослободат поради конфликтот.
Марзук тврди дека Мохамед ел Деиф, водачот на военото крило на Хамас, бригадите Касам, им наредил на своите борци да ги поштедат цивилите.
„Ел-Деиф јасно им рекол на борците „не убивајте жени, не убивајте деца и не убивајте стари“, тврди висок функционер на Хамас.
Мета биле воените резервисти, вели тој, и тврди дека биле убиени само „регрути […] или војници“.
„Но, жените, децата и цивилите беа изземени“, рече тој.
Би-би-си на претставникот на Хамас му прикажа видео снимки направени од членови на оваа организација, на кои се гледа како тие убиваат невооружени цивили во своите автомобили и куќи.
Марзук, чиј мазен, одмерен начин на говор понекогаш се лизгаше во ароганција за време на интервјуто, не одговори директно на прашањето.
На прашањето дали политичкото крило на Хамас знаело за подготовките за нападот, заменик-лидерот рече дека военото крило „не мора да се консултира со политичкото раководство“ и дека „нема потреба од тоа“.
Политичкото крило на Хамас, кое е со седиште во Катар, често се претставува како оддалечено од военото крило во Газа.
Британската влада, сепак, не прави разлика – политичкото крило на Хамас го прогласи за терористичка организација во 2021 година, наведувајќи дека „пристапот на разграничување меѓу различни делови на Хамас е вештачки“.
„Хамас е сложена, но единствена терористичка организација“, е ставот на британската влада.
Министерството за финансии на САД го означи Марзук како терорист и е обвинет за неколку точки за координирање и финансирање на активностите на Хамас.
Заложничка криза
Би-Би-Си разговараше со Марзук на денот кога Израел ги отфрли барањата на САД и ОН за „хуманитарна пауза“ во Газа за да се достави помош за палестинските цивили во јужниот дел на Појасот Газа и да се помогне во ослободувањето на некои од 240-те заложници кои ги држеше Хамас, окупирани на 7 октомври.
Израелскиот премиер Бенјамин Нетанјаху во петокот рече дека сите заложници мора да бидат ослободени пред да се постигне привремено примирје.
Марзук тврди дека Хамас нема список на сите оние што ги нарекува „гости“, ниту пак знае каде се многу од нив бидејќи ги држат „различни фракции“.
Во Газа има неколку групи, вклучувајќи го и палестинскиот исламски џихад, кои тесно соработуваат со Хамас, но наводно се независни.
Марзук вели дека собирањето информации бара прекин на огнот и додава дека има други приоритети додека територијата е под постојано бомбардирање.
Марзук ќе игра клучна улога во понатамошниот развој на конфликтот со Израел и најверојатно ќе биде централна фигура на Хамас во преговорите за заложниците.