Турскиот претседател Реџеп Таип Ердоган изјави дека Турција е подготвена да ѝ помогне на Унгарија да испорача природен гас преку Трансанадолскиот гасовод (ТАНАП).
„Ние заедно со Азербејџан сме подготвени да обезбедиме секаква поддршка во испораката на природен гас за Унгарија преку ТАНАП“, рече претседателот Реџеп Таип Ердоган на заедничката прес-конференција со неговата унгарска колешка Каталин Новак, која беше во посета на Анкара.
Пофалувајќи ги долгогодишните врски меѓу двете земји, Ердоган рече дека „раката на помош“ што Унгарија ѝ ја подаде на Турција по двата разорни земјотреси во февруари е „цврст пример“ за тие силни односи.
„Разговаравме за различни аспекти на односите меѓу Турција и Унгарија на состаноците што ги одржавме денеска“, додаде Ердоган.
На дневен ред на средбата биле и трговските, воените, економските и културните односи, на кои биле прегледани снимки од земјотресот, посочи Ердоган.
Потврдена е и взаемната волја за понатамошно зајакнување на врските засновани на засилено стратешко партнерство, рече Ердоган, додавајќи дека двете земји се договориле да го одржат шестиот состанок на нивниот Совет за стратешка соработка во декември во Будимпешта.
„Ќе ја прославиме 2024 година како година на заедничка култура“, рече Ердоган, истакнувајќи дека економските и трговските односи меѓу Турција и Унгарија се зајакнуваат, пренесува „Сеебиз“.
„Нашиот обем на трговија достигна 3,5 милијарди долари минатата година. Разговаравме за чекорите што треба да се преземат за да се постигне нашата заедничка цел од шест милијарди долари“, рече Ердоган.
Ердоган рече дека тој и Новак ја истакнале важноста од развивање на соработката меѓу двата сојузници на НАТО во одбранбената индустрија.
Турскиот претседател исто така рече дека неговата земја очекува Унгарија „да продолжи со поддршката за постигнување напредок во позитивна програма во односите Турција-ЕУ“.