Претседателот Стево Пендаровски, во рамки на проектот „Лице в лице со претседателот“ денеска во Центарот за култура „Трајко Прокопиев“ во Куманово се сретна со актерите Љубица Гојковиќ, Ѓорѓи Антов и Илија Струмениковски, кои во 1971 година беа дел од актерската постава на култната претстава „Бегалка“ на Васил Иљоски.
Повод за средбата е 95-годишнината од премиерната изведба на претставата која била одиграна во далечната 1928 година под името „Ленче Кумановче“, како драмско дело во 5 чина каде до израз доаѓаат тенденциите на Иљоски да ја прикаже посебноста и колоритноста на македонскиот јазик.
Тројцата актери ги споделија со претседателот Пендаровски своите сеќавања од пред половина век кога тие ја изведувале оваа претстава во кумановскиот театар, со нивните актерски патешествија низ времето и го запознаа со најблескавите моменти од богатите актерски кариери.
Претседателот Пендаровски, изразувајќи признание и почит за импресивниот животопис и повеќедеценискиот придонес на тројцата актери во театарската и филмската уметност, рече дека со нивната автентична изведба на ликовите на Ленче, Бошко и Петко во „Бегалка“ трајно се вградија во историјата на македонскиот театар и култура.
Интегрално соопштение