Лидерот на Северна Кореја гордо ја покажува својата најстара ќерка во државните медиуми во последните месеци.
Тој ја држеше за рака за време на ракетниот тест минатиот ноември, а потоа ја имаше покрај себе додека лојалните трупи се наредени пред нив.
Џонг-ун има три деца, син и две ќерки.
Ким Ју-ае наводно е родена во 2013 година, откако лидерот добил син.
Поради нејзиното се позачестено присуство кај шефот на единствената комунистичка династија во светот, јужнокорејската разузнавачка служба дошла до заклучок дека тоа веројатно е симболично претставување на неговата крвна линија во однос на политичкото наследување, пишува ДВ.
Но, аналитичарите не се сосема сигурни дека Ким Ју-ае ќе биде негов наследник бидејќи тоа би значело значителна промена во општествениот став на Северна Кореја, во која доминираат мажи, а таквиот потег речиси сигурно ќе предизвика отпор од високите функционери, кои се претежно од машки пол.
„Само Ким Џонг-ун го знае тоа“
Сепак, политичките и воените експерти признаваат дека само Ким Џонг-ун знае дали еден ден ќе ја постави својата ќерка за следен лидер на оваа земја.
Севернокорејските медиуми прикажаа слики од високи функционери кои ѝ се поклонуваат на Ким Ју-ае, велејќи дека тоа е неговото омилено дете.
Не се знае многу за неговата најстара ќерка, ниту за нејзиниот брат или сестра.
Но, јужнокорејското разузнавање вели дека со носењето на својата ќерка на јавни места, Јонг-ун ги поставува темелите за трета линија на наследување во Пјонгјанг.
Самиот Ким ја презеде функцијата од својот татко Ким Џонг-ил, откако тој ненадејно почина во декември 2011 година. Но, јавноста со години не мислеше дека тој ќе биде новиот наследник.
Таа чест се очекуваше да му припадне на неговиот постар полубрат, Ким Џонг-нам, се додека не го налути својот татко во 2001 година обидувајќи се да замине во Дизниленд.
Имено, тој бил уапсен на аеродромот во Токио додека патувал со фалсификуван пасош на Доминиканската Република и наводно планирал да посети забавен парк.
Иако Ким Џонг-ун го „победи“ својот полубрат, тој сепак го гледаше како закана за неговото владеење.
Во февруари 2017 година, Ким Џонг-нам беше убиен на аеродромот во Куала Лумпур со нервен агенс VX, а напаѓачите, наводно, побегнале во Северна Кореја.
„Тешко ми е да поверувам дека ќерката ќе стане наследничка, пред се затоа што е жена“
„Тешко ми е да поверувам дека оваа девојка ќе ја преземе улогата на татко, пред се затоа што е женско“, вели Тошимицу Шигемура од Универзитетот Васеда во Токио и автор на серија книги за династијата Ким.
„Северна Кореја е сè уште многу конзервативно и конфучијанистичко општество, што значи дека е невозможно Ким Ју-ае да стане наследник. Мислам дека Јонг-ун ќе ја пренесе власта на својот син кога ќе дојде време“, изјави Шигемура за ДВ.
„Верувам дека Ким ја покажуваше својата ќерка да ја покаже својата решителност и покрај многу сериозните проблеми со кои се соочува земјата поради економските санкции и затворањето на границите за време на пандемијата. Тој се обидува да го одвлече вниманието на луѓето, да го покаже своето среќно семејство и да го импресионира населението со своите фигура на татко и водач“, додаде тој.
Сите информации поврзани со најновите случувања во Северна Кореја можете да ги прочитате ТУКА.