Службата на итна медицинска помош во Куманово остана парализирана на нерасчистените патишта, комби возилата немаат ланци паркиран се во гаражите, а од две теренски лади ниви само една е функционална. Граѓаните да се јавуваат само за итни случаи, апелираат од итната служба , а во случај да има повредени , не се во можност да ги пренесат до болницата.
Службата на Итна медицинска помош во Куманово е немоќна да одговори на повиците. Велат дека немаат со што да излезат и да стигнат до граѓаните на кои им е неопходна помош. Патиштата се заледени и неисчистени, а комби возилата се паркирани во гаражите бидејќи за нив нема ланци, кои се задолжителна зимска опрема до 15 март .
Вработените во брзата помош се во безизлезна ситуација, имаат две теренски возила, лада нива од која едната е нефункционална.
Имаме четири теренски лади ниви , но две се користат од службата за домашна посета, а две се во итната помош, но една не можеме да ја стартуваме – информираат за Кумановски Муабети од службата .
Велат дека и покрај апелот и реакциите никој ништо не превзема и додаваат доколку животот на луѓето зависи од помошта на службата на итната медицинска помош тие се немоќни да излезат и да помогнат.
Директорот на Заводот за здравствена заштита , Миомир Панковски, вели дека имаат доволно теренски возила за итна помош, но вината е на службата која треба да го расчисти патот. Домашната посета не секогаш ги користи теренските возила и доколку се потребни можат да се позајмат, а за комби возилата вели дека се тешки и дека не можат да се возат по лед.