Лидерите на Групата 20 големи економии (Г20) денеска на самитот во Индонезија прифатија декларација во која „најостро ја осудуваат“ руската агресија врз Украина.
Во декларацијата се наведува дека „мнозинството членки силно ја осудуваат војната во Украина и нагласуваат дека таа предизвикува огромно човечко страдање и ги влошува постоечките слабости во глобалната економија“.
Тоа беше одобрено од сите членки на блокот Г20, изјавија за Ројтерс три дипломатски извори.
Германскиот делегат рекол дека е усвоен без никакви измени во однос на вчера објавениот нацрт.
Во декларацијата се вели дека има „различни ставови и различни оценки за ситуацијата и санкциите“.
Лавров го напушти самитот
Мора да се почитува меѓународното право, а заканата за употреба на нуклеарно оружје е неприфатлива, нагласуваат лидерите во декларацијата, поздравувајќи ја иницијативата за извоз на житарки преку пристаништата на Црното Море.
Исто така, се наведува дека централните банки-членки ќе продолжат соодветно да го калибрираат темпото на затегнување на монетарната политика, имајќи ја предвид потребата да се ограничат „прелевањата меѓу земјите“.
Членовите ја потврдија својата посветеност да се избегне прекумерна нестабилност на девизниот курс, признавајќи дека „многу валути се значително погодени“ оваа година.
Рускиот министер за надворешни работи Сергеј Лавров отпатува од Бали во Русија, еден ден пред крајот на самитот на Г-20.
Државната новинска агенција ТАСС објави дека програмата на Лавров на самитот на Г-20 заврши „како што се очекуваше“, без да го прецизира точното време кога тој замина.