Поранешниот врховен командант на американските копнени сили во Европа, американскиот генерал Бен Хоџис не верува дека рускиот претседател Владимир Путин ќе употреби нуклеарно оружје и покрај заканите што ги упати.
„Нуклеарниот напад нема да донесе никаква непосредна воена корист за Путин“, истакна Хоџис во интервју за виенскиот неделник „Профил“.
Според него, Русија би претрпела само негативни последици – од контра штрајк до општа осуда.
Хоџис рече дека нуклеарниот напад ќе им оневозможи на САД да останат надвор од војната во Украина.
„САД ќе мора да реагираат воено, бидејќи Белата куќа знае дека Кина, Иран, Северна Кореја и други јасно анализираат како се однесува Вашингтон. И тоа најверојатно нема да биде нуклеарен удар, туку конвенционален контра удар“, смета тој.
Тој вели дека би препорачал акција против руската црноморска флота.
Во врска со делумната мобилизација, која беше започната во Русија, Хоџис истакнува дека војниците плаќаат цена кога повисоката хиерархија е корумпирана, кога извештаите за грешки, квалитет и ресурси недостасуваат и украсуваат.
„Можам да ви кажам што се случува во моментов. Одредени луѓе, кои имаат наредба да најдат 300.000 нови војници, ќе станат многу богати, бидејќи многумина ќе се обидат со пари да се ослободат од обврската. Ова е стара руска практика“, смета американскиот генерал.
Што се однесува до натамошниот тек на војната во Украина, тој вели дека поаѓа од тоа што до крајот на годината Украина ќе успее да ги врати руските сили на линијата на која беа пред 24 февруари.
„Во средината на следната година украинските војници ќе бидат на Крим“, уверен е Хоџис, пренесува Танјуг.