Викимедија МКД, огранокот на Фондацијата Викимедија која стои позади Википедија и нејзините сродни проекти, ја зголемува и збогатува својата програма. Поради зголемен интерес од јавноста, како дел од активности, Викимедија МКД најавува нов циклус бесплатни обуки за уредување на Википедија.
Овие обуки се одлична можност за сите кои сакаат да научат како да создаваат и уредуваат статии на најголемата енциклопедија во светот. Без разлика дали се почетници кои за прв пат се среќава со Википедија или веќе имаат основно познавање, овие обуки се прилагодени за да одговараат на различните потреби на заинтересираните луѓе. Обуките се одржуваат секој четврток и сабота, во периодот од 12:00 до 14:00 часот, во просториите на Младинскиот културен центар (МКЦ) во Скопје. Викимедија МКД ги охрабрува сите заинтересирани да се придружат и да станат дел од оваа иницијатива. Сѐ што е потребно за учество е личен лаптоп, малку слободно време и желба да научите нешто ново.
Програмата на обуките е внимателно осмислена за да ви обезбеди сеопфатно знаење и практични вештини. Луѓето имаат можност да научат како да создават нови статии, да ги уредуваат постоечките, да користат веродостојни извори и да го збогатат своето знаење. Покрај техничките аспекти, учесниците ќе добијат и поддршка од тимот на искусни ментори на Викимедија МКД, кои ќе помогнаат во секој чекор од процесот.
Викимедија МКД е непрофитно, невладино и непартиско здружение ,кое делува на територијата на Македонија и се занимава со умножување на слободни содржини за непрофитна употреба, пред се активности поврзани со Википедија и нејзините сродни проекти.