Во индустриската зона Алијага во Измир, денес околу 11:30 часот по локално време, се случи катастрофална експлозија во фабриката за железо и челик „Хабаш“, по што избувна катастрофален пожар.
Според првите информации од терен што ги пренесоа турските медиуми, се сомнева дека има многу мртви и повредени, додека голем број работници останаа живи закопани под урнатините на фабриката.
Силата на детонацијата буквално разнесе дел од производствениот комплекс, уривајќи ги кровните и ѕидните конструкции врз работниците кои беа на смена.
Густ, црн чад се издигаше од областа околу челичарницата, која го покриваше целиот округ, а десетици противпожарни возила, полиција и медицински екипи веднаш беа испратени на местото на настанот.
İzmir Aliağa’daki fabrikada çok büyük patlama… Karbondioksit fabrikasında patlama meydana geldiği bildirilirken itfaiye ekipleri olaya müdahale ediyor. https://t.co/c1FfzBawlY
— İzmir (@izmir) November 9, 2026
Како што објавува турскиот портал НТВ Хабер, повеќе од 10 работници со тешки изгореници, фрактури и трауми од ударниот бран веќе се итно транспортирани во државната болница „Алијага“ и други клинички центри во Измир.
Спасувачките екипи од Агенцијата за управување со катастрофи и вонредни состојби (АФАД) се во френетична трка со времето за да стигнат до работниците заробени под тешкиот бетон и металниот шут.
Иако сè уште нема официјална потврда за причината, локалните медиуми објавија дека разорната експлозија се случила или во фабриката за полнење јаглерод диоксид или во делот за преработка на цинк, каде што прашината во контакт со влага може да предизвика формирање на експлозивен водород.
Целата населба околу фабриката е целосно блокирана, а акцијата за спасување и локализирање на пожарната стихија е во тек.