Во полициска операција на белгиските власти, поддржана од Европол, е разбиена организирана криминална група од Израел, која наводно произведувала и увезувала фалсификувани луксузни часовници и дијаманти во „Дијамантскиот кварт“ во Антверпен.
Операцијата резултираше со апсење на 15 осомничени, од кои 11 во Белгија, двајца во Израел, додека еден наводен член на оваа мрежа е уапсен во Словачка и Холандија, се наведува на веб-страницата на Европол.
За време на операцијата спроведена во вторник, извршени се 26 претреси во Белгија, Израел, Холандија и Словачка, при што се запленети 165 луксузни часовници со сертификати, накит и други фалсификувани производи, 200 дијаманти, 209.000 евра во кеш, крипто книги, оружје, наркотици од 14 килограми, повеќе електронски уреди, меѓу кои мобилни телефони и компјутери, кредитни картички и финансиски документи.
Истрагата започнала во 2022 година кога полицијата во Брисел пресретнала пакет со 600 грама кокаин наменет за продажба во Израел.
Благодарение на понатамошната истрага, откриено е дека голема криминална организација, која се занимавала со трговија со дрога, фалсификувала и луксузни предмети.
Според органите на прогонот, криминалната мрежа произведувала лажни луксузни часовници надвор од ЕУ, мешајќи оригинални делови со лажни компоненти, за да ги измами потенцијалните купувачи.
Произведените часовници потоа би се увезувале и продавале на белгискиот пазар, а осомничените шверцувале и кокаин и синтетички дроги низ светот.
Членовите на оваа криминална мрежа переле пари преку сложени шеми, вклучувајќи криптовалути, нелегални банкарски системи и реинвестирање во недвижности, особено во Португалија.
Покрај експертите од Европол и белгиските власти, во операцијата учествуваа и властите на Холандија, Португалија, Словачка и Израел, со поддршка на мрежата ON, која е финансирана од Европската комисија и предводена од италијанската антимафија Дирекција (ДИА).