Рачно изработена бомба експлодираше рано утрово во близина на влезот на Министерството за правда на Филипините, а сомнителна направа подоцна беше откриена во близина на Сенатот, неколку часа пред годишното обраќање за состојбата на нацијата на филипинскиот претседател Фердинанд Маркос, соопшти полицијата.
Директорот на националната полиција, Хозе Меленсио Нартатез помладиот, на прес-конференцијата изјави дека постои „голема веројатност овие два (инциденти) да се поврзани“ и рече дека полицијата ги следи сите закани, вклучително и заканите со бомби, но дека нешто излегло од контрола и експлодирало пред Министерството за правда.
„Истрагата е во тек и засега не можеме да ги откриеме деталите за овој инцидент“, изјави портпаролот на полицијата во Манила на истата прес-конференција, според Фигаро.
Обраќањето за состојбата на нацијата на претседателот Фердинанд Маркос доаѓа во услови на зголемени политички тензии на Филипините.
Неговата потпретседателка и поранешна сојузничка Сара Дутерте (48), која има намера да се кандидира за претседател во 2028 година, се соочува со судење за импичмент што започна на почетокот на јули.
Стотици илјади Филипинци протестираа во последните месеци против најголемиот корупциски скандал што ја погодил земјата, во кој се вклучени лажни градежни проекти наменети за заштита од поплави, вклучувајќи и насипи што никогаш не биле изградени.