Порториканците би можеле да се приближат чекор поблиску до референдум за тоа дали островот треба да стане американска федерална држава, независна држава или да има друг тип на влада кога Претставничкиот дом денеска ќе гласа за нацрт-законот што го опишува тој процес, според Си-Ен-Ен.
Комитетот на Претставничкиот дом вчера го одобри Законот за статус на Порторико, отворајќи го патот за гласање во оваа комора.
Законот ги поставува условите за одржување референдум, како и трите потенцијални самоуправни статуси на Порторико, независност, целосна државност на САД или суверенитет со слободно здружување со САД.
Последната опција како прашање на статус е на сила во Микронезија, Палау и Маршалските Острови.
Порторико, кој има околу 3,3 милиони луѓе и висока стапка на сиромаштија, стана американска територија во 1898 година.
Активистите со децении се залагаат за поголемо самоопределување, вклучително и целосна државност.
Од 1960-тите до денес, на оваа тема се одржани шест референдуми, но тие не беа обврзувачки.
Само американскиот Конгрес може да му додели државност на Порторико во рамките на САД.
– По 124 години колонијализам, Порториканците заслужуваат фер, транспарентен и демократски процес за конечно да се реши прашањето за нивниот статус – напиша на Твитер пратничката Нидија Веласкез, коспонзор на законот од Демократската партија.
Граѓаните на тој карипски остров се Американци, но немаат право на глас во Конгресот, не можат да гласаат на претседателски избори, не плаќаат федерален данок на доход на приходите остварени на островот и немаат исти услови за некои федерални програми како и другите граѓани на САД.
Доколку нацрт-законот помине во Претставничкиот дом, ќе му требаат 60 гласа во тесно поделениот Сенат и потписот на демократскиот претседател Џо Бајден за да стане закон во целосна смисла на зборот.