Кремљ нема детали за сеопфатниот мировен договор што го објави американскиот претседател Доналд Трамп, изјави денес портпаролот на рускиот претседател, Дмитриј Песков.
Трамп претходно најави подготовка на мировен договор што би излегувал од рамките на конфликтот во Украина и би можел да се однесува на безбедноста на цела Европа.
„Не, немаме никакви детали“, изјави Песков пред новинарите, одговарајќи на прашањето за каков договор станува збор и во која фаза е неговата подготовка, пренесува Спутник.
Портпаролот на Кремљ, исто така, изјави дека Москва сè уште не добила никакви предлози од европските земји во врска со идната архитектура на европската безбедност.
„Што се однесува до некои идеи на Европејците во врска со европската безбедносна архитектура, не сме ги добиле, не ни се познати“, рече Песков.
Сепак, тој нагласи дека разговорите со европските земји ќе бидат неопходни порано или подоцна, особено кога станува збор за воспоставување систем на меѓусебна безбедност меѓу Русија и Украина.
„Со оглед на тоа што дискусијата, на еден или друг начин, ќе се однесува на идната безбедносна архитектура во Европа, поточно во однос на меѓусебната безбедност на Русија и Украина, секако, ќе биде невозможно да се продолжи без Европејците во одредена фаза. Разговорот со Европејците ќе биде неопходен“, истакна Песков.
Според неговата проценка, европските земји сè уште покажуваат неодлучност и недостаток на подготвеност за дијалог со Москва.
„Како што гледаме, тие сè уште не успеале ниту да одлучат кој е овластен да зборува во нивно име. Значи, од таа страна, гледаме продолжена состојба на неодлучност и недостаток на подготвеност“, рече портпаролот на Кремљ.
Зборувајќи за односите со Вашингтон, Песков позитивно ја оцени средбата на претставниците на Русија со првата дама на Соединетите Американски Држави, Меланија Трамп, во Белата куќа.
„Тоа е позитивна средба. Важно е да се одржи позитивно расположение и подготвеност за продолжување на хуманитарната работа“, рече Песков.
Тој додаде дека Меланија Трамп и нејзиниот тим вложиле значителни напори за спроведување на хуманитарната операција во Аљоша.