Обединетите нации предупредија дека сегашната епидемија на ебола може да ја чини економијата на Африка до 3,6 милијарди долари и да уништи стотици илјади работни места, ескалирајќи во сериозна развојна криза.
„Ако имаме ресурси и преземеме чекори, можеме да ја ограничиме оваа епидемија и да спречиме понатамошни загуби“, рече Дамиен Мама, постојан претставник на Програмата за развој на Обединетите нации (УНДП) во Демократска Република Конго.
Тој нагласи дека во спротивно, здравствената криза може да стане многу подлабока и продолжена развојна криза во целиот регион, но и на ниво на целиот континент, пренесува Ројтерс.
Демократска Република Конго соопшти дека бројот на потврдени случаи на ебола во земјата достигнал 1.307, вклучувајќи 377 смртни случаи.
Според официјалните податоци, случаи на инфекција се регистрирани во провинциите Итури, Северен Киву и Јужен Киву.
Генералниот директор на Светската здравствена организација (СЗО), Тедрос Аданом Гебрејесус, изјави дека ризикот од понатамошно меѓународно ширење на болеста засега е оценет како низок, но нагласи дека ситуацијата бара внимателно следење.