Поранешниот американски претседател Барак Обама ги повика Американците „да ја погледнат целата вистина“ кога се обидуваат да ја разберат војната меѓу Израел и Хамас, велејќи дека „ничии раце не се чисти“.
„Ничии раце не се чисти“, рече 44-от американски претседател за време на интервјуто за „Спасете ја Америка“, подкаст што го организираа неговите поранешни соработници во Белата куќа, пишува „Њујорк пост“.
Обама рече дека она што го направи Хамас е страшно и дека нема оправдување за тоа, но нагласи дека е точно и дека израелската окупација и она што им се случува на Палестинците е неподносливо.
Според него, единствен начин да се реши кризата е да се прифатат тие навидум контрадикторни идеи.
„Вистината е дека во моментов умираат луѓе кои немаат никаква врска со она што го направи Хамас“, рече Обама и ги обвини социјалните мрежи за продлабочување на јазот меѓу двете завојувани страни, пренесува Танјуг.
Поранешниот американски претседател е запаметен по затегнатите односи со израелскиот премиер Бенјамин Нетанјаху, со кого се судри околу нуклеарниот договор меѓу САД и Иран и проширувањето на израелските населби во областите кои Палестинците ги сметаат за нивна територија.
Обама ги повика Американците „да не се предаваат на гневот“, туку наместо тоа да ги слушаат спротивставените гледишта.