Бројот на луѓе кои загинаа во лизгање на земјиштето во Етиопија се зголеми на 157, соопшти денеска државен претставник.
„Потрагата сè уште трае. Областа е многу предизвикувачка. Досега пронајдовме 157 тела и веруваме дека бројот ќе се зголеми“, изјави за Ројтерс шефот на Националната агенција за одговор при катастрофи, Маркос Мелесе.
Претходно беше соопштено дека бројот на жртви е 55.
Локалниот функционер Дагмави Ајел изјави дека меѓу жртвите има мали деца и бремени жени, пренесува АП.
Повеќето од жртвите вчераутро биле затрупани од одрон од кал, а пет лица биле спасени.
Како што е наведено, се очекува бројот на загинати да се зголеми додека продолжуваат спасувачките операции.
Одроните се вообичаени за време на сезоната на дождови во Етиопија, која започна во јули и се очекува да трае до средината на септември.