Локалните пратеници во Мексико го одобрија нацрт-законот со кој се суспендираат родителските права на мажите кои се под истрага за фемицид, како и построги санкции за напади со киселина врз жени.
Мексико се соочува со едно од највисоките нивоа на родово засновано насилство во светот, а убиствата на жени и девојки доведоа до жестоки протести во таа земја, пишува Ројтерс.
Пратениците во централната држава Пуебла едногласно ги поддржаа измените на законот со кои би биле „отстранети, суспендирани или изменети родителските права во случаи на фемицид“, што предизвика гласни овации во салата по едноминутно молчење за жртвите на фемицид.
Законот го доби името Монзонски закон, по адвокатката Сесилија Монзон, која беше убиена минатиот мај.
Властите подоцна го уапсија главниот осомничен, поранешен конгресмен и татко на нејзиното дете.
Државните пратеници, исто така, едногласно донесоа закон со кој се казнуваат напади со киселина врз жени со до 40 години затвор, третирајќи го делото како еквивалент на обид за фемицид.
Законот се нарекува закон на Малена, по саксофонистката Марија Елена Риос, која сведочеше за напад со киселина во кој се здоби со тешки изгореници.
„Оваа реформа нека биде пример на национално ниво што ќе ни обезбеди подобра правна рамка и пристап до живот без насилство“, напиша локалната пратеничка Нора Ескамила на Твитер.
Бројот на убиени жени во Мексико во 2022 година се зголеми за повеќе од 600 – на 7.646, а повеќето случаи беа прогласени за помали злосторства за убиство од небрежност. Тоа е во просек повеќе од 20 жени убиени секој ден.
Владините бројки од 2019 година покажуваат дека на секои 100 убиени жени во Мексико, биле изречени само четири казни.