Службеници на американската служба за имиграција и царина (ICE) убиле мексикански државјанин за време на интервенција во Хјустон, соопшти денес агенцијата, наведувајќи дека пукањето се случило откако мажот наводно се обидел да удри еден од полицајците со возило.
Според соопштението на ICE, полицајците се обиделе да сопрат возило управувано од Лоренцо Салгадо Араухо, за кој се вели дека нема регуларен имиграциски статус во Соединетите Држави, објави ABC.
Агенцијата тврди дека Араухо не ги послушал наредбите на полицајците и „го користел своето возило како оружје“ за време на интервенцијата, обидувајќи се да прегази полицаец.
Како што е наведено, полицаецот потоа отворил оган со своето службено оружје „во самоодбрана“.
„Возачот бил погоден, а веднаш биле повикани службите за итни случаи. Тој бил префрлен во болница, каде што им подлегнал на повредите“, објави ICE.
Федералното биро за истраги (FBI) започна истрага за околностите на инцидентот.
Ова е втора пукотница во која се вклучени полицајци на ICE за помалку од една недела.
Пред шест дена, полицаец од агенцијата употребил огнено оружје додека се обидувал да го запре осомничениот во Харисбург, Пенсилванија, откако ICE соопшти дека возачот се обидел да им се закани на полицајците со своето возило и избегал од местото на настанот.
Осомничениот не бил пронајден во тој инцидент.