Рускиот министер за надворешни работи Сергеј Лавров денес изјави дека, пред да се зборува за неуспехот на договорите постигнати на самитот на Русија и САД во Алјаска, потребно е да се утврди кој е одговорен за тоа.
Коментирајќи ја изјавата на американскиот државен секретар Марко Рубио дека договорите од Анкориџ не успеаја, Лавров рече дека рускиот претседател Владимир Путин ги прифатил предлозите подготвени од Соединетите Американски Држави и одобрени од американскиот претседател Доналд Трамп, објави Спутник.
„Ако има предлог и има договор, тогаш во Анкориџ се постигнати договорени резултати. Трамп рече дека тоа бил компромисен американски предлог и ние го прифативме, бидејќи секој договор подразбира компромис“, рече Лавров.
Тој додаде дека Трамп потоа изразил верување дека украинскиот претседател Володимир Зеленски ќе го прифати предложеното решение, но тоа не се случило.
Лавров, исто така, изјави дека за време на состанокот во Манила, му предал на Рубио избор од изјавите на Трамп во кои американскиот претседател позитивно зборувал за резултатите од самитот во Алјаска.
„Трамп рече дека практично сè решивме, дека можеби останува уште едно прашање, но дека основата за договор постои. И нашите проценки беа исти. Верувавме дека прифаќањето на американскиот предлог ќе овозможи прекин на непријателствата и почеток на политички преговори“, рече шефот на руската дипломатија.
Лавров, исто така, оцени дека отфрлањето на американските предлози е последица на континуираната воена поддршка на Западот за Украина.
Според него, Украина продолжува да добива големи количини беспилотни летала, разузнавачка и друга воена поддршка, вклучително и функционирањето на системот Старлинк, кој, тврди тој, ѝ овозможува да ги продолжи борбените операции, пренесува Танјуг.