Русинот Виктор Бут, кој на вчерашната размена на затвореници беше разменет за американската кошаркарка Бритни Грајнер, е познат како „трговец на смртта“ чија животна приказна го инспирирала Холивуд.
Озлогласениот шверцер на оружје со години им бегаше на американските власти, иако важеше за еден од најголемите непријатели на американската држава.
Кога конечно бил фатен, Бут бил осуден на 25 години затвор во американски суд.
Пресудата покажа дека овој Русин учествувал во заговор за убивање Американци, соработувал со терористи и продавал оружје на колумбиските герилци, познати како ФАРК.
Кремљ реагираше на пресудата изречена на Бут во 2012 година, велејќи дека таа е „неоснована и пристрасна“.
Бут беше вклучен во меѓународни барани документи со години додека американските агенти не го уапсија во Тајланд во 2008 година.
Неговата животна приказна беше снимена и во холивудскиот филм „Господар на војната“ со Николас Кејџ во главната улога.
Во Америка, се верува дека Бут бил офицер за време на Советскиот Сојуз и дека го искористил распадот на СССР за да шверцува советско оружје во Либерија, Сиера Леоне и Авганистан.
Според американски извори, Бут не би можел да продава оружје во воените зони доколку ја немал помошта од Кремљ, па најверојатно работел за руската разузнавачка служба.
Според американските медиуми, Министерството за правда и Пентагон биле против ослободувањето на Виктор Бут бидејќи предвидуваат дека трговецот со оружје ќе се врати на својата стара „трговија“ и повторно ќе претставува закана за Америка и нејзините сојузници.