Во Изложбениот салон на НУ Центар за култура „Трајко Прокопиев“ – Куманово во петок со почеток од 19:30 часот ќе биде отворена изложба на графики со наслов „Живи форми“ од авторката Мирослава Цветковиќ.
Изложбата содржи дваесетина графики работени во повеќе графички техники , во периодот од неколку последни години.
Мирослава Цветковиќ е родена 1973. год. во Куманово, Р. Македонија, Дипломирала на Факултетот за ликовни уметности при Универзитетот „Св. Кирил и Методиј“ во Скопје, во 1998. год., во класата на проф. Зоран Јакимовски, на оддел графика, со насока графички дизајн. Во 1999. год. се стекнува со доквалификација за ликовен педагог, на истиот факултет. Член е на ДЛУМ од 1998. год.
Реализирала резиденцијален престој во Cité Internationale des Arts во Париз, во студиото на Република Македонија, во 2002. год.
Во периодот од 1997-2003. год. работи на повеќе проекти и театарски претстави како графички дизајнер на плакати и др. рекламни материјали за Народен Театар Куманово, Р. Македонија.
Изложувала самостојно во Македонија, како и на повеќе групни претставувања на локалната уметничка сцена, како на ДЛУМ, ДЛУК и др., но и на многубројни меѓународни групни изложби во Македонија, Србија, Хрватска, Полска, Романија, Чешка, Канада, Бугарија, Италија, Грција, Литванија. Учесник е и на повеќе ликовни колонии во Македонија и во странство. За својата работа има добиено награди и признанија.
Живее и работи во Куманово, Р.С. Македонија како слободен уметник.
Награди
2000 – Прва награда на ДЛУМ за графика мал формат – Драгутин Аврамовски Гуте, Скопје, Македонија
2016 – Прва награда на ДЛУМ за графика мал формат, Скопје, Македонија
2023 – Certificate of Honour на 1. Меѓународно биенале на минијатурни графики и цртежи Битола – 1. ИБМБ – Битола, 2023., Битола, Р.С. Македонија
2024 – Certificate for artistic-graphic outstanding achievements на 11. Меѓународно графичко триенале-Битола, 2024, Битола, Р.С. Македонија
За нејзиното творештво Билјана Станковска ќе запише:
…“ Да се отслика неприкосновената содржателност на микросветот во универзумот, да се декодира сјајот на светлината, непречено да се преминат спиралните скалила што водат кон планетарното поимање на светот, потребна е висока ликовна спознајност и амбиција, силно љубопитство, идејна посветеност и неисцрпна креативна енергија.
Од разноликоста на темите и од бројноста на ликовните техники и композиции, уметничкиот опус на Мирослава Цветковиќ е неодминливо препознатлив во високите сфери на уметноста, а восхитот и естетските импресии од нејзиното моќно и совесно владее на ликовната сцена се исклучително доживување. Со сопствен ликовен јазик, таа нè води низ лавиринтите на семожното постоење на поинакви светови; со линијата како исклучителна насока и крстосница, како бран и струење, како самоцел на беспрекорна белина или самата линија – девствено бела и копнежливо нежна небаре трепери во таинствено црниот простор. Невоздржана е возбудата на гледачот пред споделената пристапност до возвишеното во едноставните нешта што од идеја преоѓаат во слика со тематска конкретност. Уверливо извонредни се можностите на линијата што дарежливо и со маестралната прецизност, Мирослава Цветковиќ ни ги открива филиграните од животворните нишки на постоењето. Речиси е невозможно да не го забележиме струењето на животот во фундаментот на листот естетски усогласен со женскиот акт. Ете ја неделливата и двојбена комуникација на живата материја – визија и субјективна слобода на графичарката.
Обземена од совршеноста на сеопфатното, таа инспиративно ја разложува еднородната тематика, повторливоста ја потсилува со експлозијата на боите и варијацијата е со восхитувачка автентичност. Моќта на варијацијата ја поттикнува мирната белина во автентично златеење. И наеднаш – неочекувано за окото на гледачот – самоуверен, длабок изблик на бои од разградената светлина. Миговно провидение на светото и световното!
Со восхит сме пред фасцинантниот раскош на ефективната визуелност…“
Изложбата ќе биде поставена до 25.12.2024.
Интегрално соопштение