Жителите на Ерфурт се најзадоволни од животот меѓу жителите на 40-те најголеми германски градови, според истражувањето „Атлас на среќата“, спроведено од Универзитетот во Фрајбург и Јужногерманската државна лотарија (SKL).
Главниот град на Тирингија го зазеде првото место на рангирањето со оценка од 7,74, пред Аугсбург и Дизелдорф, додека Росток беше последен со оценка од 5,8, објави „Шпигел“.
Авторите на студијата наведоа дека Ерфурт се карактеризира со релативно ниски кирии, висок квалитет на животната средина и економски индикатори малку над просекот во споредба со другите германски градови.
Истражувањето опфати 23.286 испитаници на возраст од 16 до 84 години, анкетирани помеѓу јануари 2023 и април 2026 година во градови со повеќе од 200.000 жители.
Според резултатите, жителите на источногерманските градови се генерално помалку задоволни од животот.
Берлин го освои 35-то место, а Дрезден 31-во, додека Франкфурт на Мајна и Висбаден беа на дното на листата.
Студијата покажа дека задоволството од животот генерално се намалува со големината на градот, при што високите кирии, повисоките стапки на криминал, оптоварената инфраструктура и послабите индикатори за ментално здравје придонесуваат за пониски резултати.
Росток, кој го освои последното место, и покрај добрите резултати во областите безбедност, инфраструктура и животна средина, се карактеризира со постаро население, висок удел на самохрани домаќинства и ниска стапка на сопственост на недвижен имот, пренесува Танјуг.