Воената команда на Корпусот на Исламската револуционерна гарда (ИРГЦ) денеска, 18 април, издаде соопштение во кое тврди дека контролата над Ормускиот Теснец сега „се вратила во претходната состојба“ поради континуираната американска блокада на иранските пристаништа.
Во изјавата цитирана од иранскиот радиодифузер IRIB, командата на ИРГЦ рече дека САД „продолжуваат со пиратеријата и поморските кражби под маската на таканаречената блокада“.
„Поради оваа причина, контролата над Ормускиот теснец се врати во претходната состојба, а овој стратешки воден пат сега е под строга управа и контрола на вооружените сили“, се наведува, додавајќи:
„Додека Соединетите Држави не ја вратат целосната слобода на навигација за бродовите што патуваат од Иран до нивните дестинации и назад, статусот на Ормускиот Теснец ќе остане строго контролиран и во претходната состојба.
Да потсетиме, по неколкунеделни тензии и сериозни нарушувања во глобалниот поморски сообраќај, Иран вчера објави дека преминот низ Ормускиот теснец повторно е целосно отворен за комерцијални бродови – но само за време на сегашниот прекин на огнот поврзан со конфликтите во регионот, вклучително и Либан.
Иранскиот министер за надворешни работи Абас Арагчи вчера изјави дека сите трговски бродови ќе можат да ја користат оваа стратешки клучна рута, со координација со иранските власти и однапред дефинираните коридори поставени од Организацијата за пристаништа и поморство на земјата.