Хонг Конг ќе го забрани поседувањето и користењето електронски цигари на јавни места до средината на 2026 година, а тамошните власти наведуваат здравствени причини.
„За да ги заштитиме нашите млади луѓе, веруваме дека е време да се забрани употребата на електронски цигари“, рече локалниот здравствен службеник Ло Чунг Мау на телевизија.
Тој додаде дека ќе започне процесот на донесување законска регулатива против поседување и користење електронски цигари на отворено.
Најавата доаѓа речиси три години откако Хонг Конг го забрани увозот, производството и продажбата на електронски цигари и загреани тутунски производи.
Според законот во Хонг Конг, секој кој увезува електронски цигари се соочува со затворска казна до седум години и парична казна од два милиони долари од Хонг Конг (250.000 евра).
Производителите и продавачите ризикуваат да добијат казна затвор до шест месеци.
Вкупно 35 земји во светот ја забранија продажбата на електронски цигари, соопшти минатата година Светската здравствена организација.