Германската морнарица неодамна забележа повеќекратни обиди за саботажа, изјави вчера за Н-ТВ командантот на морнарицата, вицеадмиралот Јан Кристијан Каак, опишувајќи ги инцидентите како „обид за тестирање на НАТО“.
Каак рече дека инцидентите вклучуваат обиди за инфилтрирање во поморските бази од копно и море и директно оштетување на бродовите.
Иако не ги наведе имињата на сторителите, тој предупреди дека дејствијата најверојатно се дел од напорите насочени кон „поткопување на довербата на јавноста“ и дестабилизација на НАТО.
Овој извештај доаѓа во време на растечка загриженост за руските тактики за хибридно војување низ Европа.
Неодамнешните инциденти во Балтичкото Море, вклучително и сомнителната саботажа на подморските кабли што ги поврзуваат Латвија, Шведска и Финска, дополнително ги зголемија безбедносните стравови и доведоа до зголемено присуство на сојузниците во регионот.
„Според нашата проценка, тие нè тестираат. Тие се обидуваат да ја поткопаат довербата на нашето општество – и на национално ниво и во рамките на алијансата (НАТО). Со тоа тие ја поставуваат основата за подоцнежна активна воена акција“, рече Каак.
Еден од највпечатливите случаи вклучува откривање на неколку десетици килограми метални струготини во моторот на новата корвета Емден на германската морнарица, во бродоградилиштето Блом+Вос во Хамбург, објавија весникот Зидојче цајтунг и радиодифузерите WDR и NDR.
Овие остатоци можеле да предизвикаат сериозна штета доколку не биле откриени навреме, што дополнително би го одложило предавањето на бродот на морнарицата.
Истрагата се уште официјално не потврдила саботажа, но властите се уште го истражуваат случајот.
Германија ги засили контрамерките, додаде Каак, нагласувајќи дека заканата од Русија на почетокот на 2025 година е значително посериозна отколку пред две години.
Тој предупреди дека експертите и разузнавачките агенции предвидуваат дека Русија би можела да биде подготвена да започне конфликт со НАТО веќе во 2029 година.