Чешката полиција го приведе митрополитот Иларион (Алфеев), епископ на Руската православна црква кој живее во Чешка, под сомнение за поседување нелегални супстанции, објави неговиот Телеграм канал на 25 мај, објавува Киев Индепендент.
Автомобилот во кој се наоѓаше митрополитот Иларион, највисокиот достоинственик на РПЦ во Чешка, беше запрен на 24 мај откако ја напушти православната црква Свети Петар и Павле во западниот чешки град Карлови Вари.
За време на претресот, според публикацијата, пронајдени се „четири мали контејнери со бела супстанца во багажникот“.
„Митрополитот Иларион категорично негира каква било вмешаност во нелегалното поседување забранети супстанции и го смета овој инцидент за провокација“, додаде каналот.
Чешката полиција потврди дека спровела „мерки поврзани со возилото во Централниот чешки регион“ врз основа на анонимна дојава за можен транспорт на дрога, но не го потврди идентитетот на лицата, објавува Novinky.cz.
Чешките власти, исто така, потврдија дека две лица се приведени, иако против нив сè уште не се покренати обвиненија. Составот и потеклото на супстанцијата ќе бидат утврдени по вештачењето.
Митрополитот Иларион, чие световно име е Григориј Алфеев, претходно беше митрополит Волоколамски и претседател на Одделот за надворешни црковни односи на Московската патријаршија.
Некогаш се сметаше за потенцијален наследник на московскиот патријарх Кирил, поглаварот на Руската православна црква и близок сојузник на рускиот претседател Владимир Путин.
Руската православна црква се смета за тесно поврзана со руската држава, а нејзиното раководство отворено ја поддржува агресијата на Москва врз Украина, според „Киев Индепендент“.
Митрополитот Иларион беше отстранет од сите функции во 2022 година и назначен за митрополит Будимпештанско-унгарски.
Тој беше повторно расчинет во 2024 година по обвинувањата за сексуално вознемирување и раскошен живот, и беше префрлен во црквата „Свети Петар и Павле“ во Карлови Вари, Чешка.
Чешкиот медиум Деник Н минатиот октомври објави дека Иларион имал врски со руската Федерална служба за безбедност (ФСБ).