Бројот на жртви од експлозијата во фабрика за челик во Измир се искачи на најмалку 17, а бројот на повредени сега е 12, додека спасувачките екипи продолжуваат да бараат работници закопани под урнатините.
Експлозијата се случи во понеделник околу пладне во фабриката на компанијата „ХАБАШ“ во населбата Бозкја, по што избувна пожар и густ чад се издигна над фабриката.
Силината на експлозијата предизвика паника во околината, противпожарните екипи го изгаснаа пожарот, а полицијата, медицинските и спасувачките служби беа испратени на местото на несреќата.
Фабриката за железо и челик „ХАБАШ Алиага“ објави дека се случила трагична несреќа за време на планираните работи за одржување на една од нејзините електрични лачни печки.
„За жал, како резултат на оваа трагична несреќа, некои од нашите колеги загинаа, некои беа повредени. Екипите за итни интервенции им ја пружија потребната помош на нашите колеги погодени од несреќата, а повредените беа пренесени во болница“, објави компанијата.
Беше наведено дека се спроведуваат потребните студии и истраги во координација со надлежните официјални институции со цел да се утврдат причините за несреќата.
Во соопштението на регионалните власти се наведува дека осум работници се закопани под урнатините, поради што спасувачките екипи продолжија со интензивното пребарување.
Повредените се пренесени во блиските болници, а еден од нив е префрлен со хеликоптер во градската болница во Измир.
Претседателот на Турција, Реџеп Таип Ердоган, во изјава по владината седница објави дека одговорните за небрежност во Измир ќе бидат повикани на одговорност.
Тој претходно добил информации за несреќата од министерот за внатрешни работи Мустафа Чифчи и министерот за енергетика и природни ресурси Алпарслан Бајрактар, кои биле на пат кон Измир.
Како што објави ТРТ Хабер, во Измир пристигна и министерот за труд и социјална сигурност, Ведат Ишихан, кој објави дека Институтот за социјално осигурување назначил главен инспектор за да ги утврди околностите на несреќата.
Министерот за правда Акин Ѓурлек објави дека е покрената истрага и дека се ангажирани четири обвинители од обвинителството во Менемен.
Турските власти упатија сочувство до семејствата на загинатите и им посакаа брзо закрепнување на повредените, со порака дека спасувачките операции продолжуваат и дека се истражуваат околностите на несреќата, според Танјуг.