Бродот MV Hondius, чии патници и екипаж се изолирани поради ширењето на хантавирусот, плови кон шпанскиот остров Тенерифе во четврток.
Пристигнувањето на бродот на Канарските Острови се очекува во сабота, а евакуацијата на патниците е планирана за почетокот на следната недела.
Според податоците од страницата за следење на поморскиот сообраќај, бродот го напуштил Капо Верде во четврток.
„Сите патници ќе останат на бродот до пристигнувањето на авионот за репатријација“, објави шпанското Министерство за внатрешни работи.
Бродот, и покрај противењето на локалните власти, треба да се закотви во пристаништето Гранадиља во Тенерифе.
„Ќе се воспостави заеднички систем за проценка на здравјето и евакуација за враќање на сите патници во нивните татковини, освен ако нивната здравствена состојба не го дозволува тоа“, објави шпанската министерка за здравство, Моника Гарсија Гомез.
Земјите-членки на ЕУ се должни да се грижат за своите граѓани, со евентуална помош од Европската комисија, а подготовката за евакуација на патниците надвор од Европа е сè уште во тек, пренесува Франс Прес.
Три дополнителни здравствени работници се качија на бродот со граѓани од 23 различни земји.
Според податоците од Светската здравствена организација (СЗО) и компанијата „Оушнвајд“, три лица – двајца болни членови на екипажот и еден близок контакт – беа евакуирани од бродот и пренесени од градот Праја на островите Капо Верде.
Овие пациенти ќе бидат лекувани во холандска, германска и шпанска болница.
Не е како ковид-19
Генералниот секретар на СЗО, Тедрос Аданом Гебрејесус, изјави дека не смета дека ситуацијата е слична на онаа на почетокот на пандемијата ковид-19.
Според него, ризикот за остатокот од светот во моментов е низок.
Европскиот центар за превенција и контрола на болести (ECDC) проценува дека сè уште има многу неизвесности околу епидемијата и повикува на претпазливост со цел да се намали веројатноста за понатамошно пренесување.
Видот на вирусот откриен кај еден од патниците евакуирани во Република Јужна Африка може да се пренесе од човек на човек, потврди министерот за здравство на Јужна Африка.
Холандската авиокомпанија KLM објави дека лицето кое починало по патувањето со MV Hondius било кратко во нивниот авион на линијата Јоханесбург-Амстердам, но се симнало пред полетувањето, пишува AFP.
Ројтерс објави дека холандското Министерство за здравство во четврток објавило дека Холанѓанка е примена во болница во Амстердам откако покажала можни симптоми на инфекција со хантавирус.
Холандската телевизиска мрежа RTL објави дека жената била стјуардеса на холандската авиокомпанија KLM, која била во контакт со жена која починала од инфекција со хантавирус во Јоханесбург.
Од почетокот на крстарењето, кое се движело од Ушуаја во Аргентина до островите Зелен ’Рт, починале три лица – холандски пар и Германка.
Еден маж е хоспитализиран во Јоханесбург, друг во Цирих, а три сомнителни случаи се евакуирани во Европа.
Швајцарското Министерство за здравство наведува дека нивниот граѓанин се вратил од Света Елена, каде што бродот престојувал помеѓу 22 и 24 април.
СЗО претпоставува дека првите случаи се заразени надвор од бродот, по што следело пренесување од човек на човек.
Починатиот холандски пар бил во Јужна Америка од крајот на ноември, патувајќи низ Аргентина, Чиле и Уругвај, пред да се качи на брод во Ушуаја на 1 април.
Хантавирусот е ендемски во одредени региони на Аргентина, особено во регионот на Андите.
Министерството за здравство на Аргентина објави испраќање на генетски материјал од таканаречениот сој „Анди“ и протоколи за лекување до погодените земји за да се олесни дијагнозата.