Ситуацијата околу војната во Украина не е смирена, а се чини дека се уште нема знаци за прекин на огнот, бидејќи нападите со дронови продолжуваат.
Киев објави дека до 30 руски војници се убиени во воздушен напад врз „дел од воената инфраструктура“ во рускиот регион Курск.
Имено, Украина во август минатата година започна напад врз областа Курск, но последните недели нејзините сили се повлекуваат под притисок на Русија.
Русија и САД тврдат дека голем број украински војници се опколени во Курската област, тврдење што Украина го оспорува.
И денеска има информации дека Украинците со „тенкови и оклопни возила“ влегле во рускиот регион Белгород, каде наводно освоиле територија од 20 до 50 квадратни километри.
Иако нема официјална потврда, на социјалните мрежи кружат гласини дека украинските сили зазеле едно село.
Промосковскиот воен блогер Генадиј Алехин во понеделникот напиша дека украинскиот напредок ја претвори меѓународната граница спроти Демидовка во „огромна сива зона“ и дека жестоки борби се водат внатре во самото село.
Рускиот воен блогер Борис Рожин во својот дневен извештај изјави:
„Населбата (Демидовка) е под украинска контрола. Руските сили се повлекле од областа, дозволувајќи му на непријателот да ја преземе. Покрај тоа, Украинците ги чистат мините и ги отстрануваат пречките познати како „змејски заби“ на границата. Руските сили сега започнуваат контраофанзива на населбата.
„Во меѓувреме, разговорите меѓу Русија и САД беа предизвикувачки, но корисни, а Обединетите нации и другите земји ќе бидат вклучени во дополнителни дискусии“, изјави за агенцијата ТАСС член на руската делегација на разговорите.
– Се разговараше за се – дијалогот беше интензивен и предизвикувачки, но многу корисен за нас и за Американците – изјави рускиот сенатор Григориј Карасин, додавајќи дека се разговарало за многу проблеми.
Карасин, поранешен дипломат, рече дека разговорите ќе продолжат и ќе ги вклучат Обединетите нации и други неидентификувани земји.
– Ќе продолжиме да го правиме тоа, вклучително и меѓународната заедница, пред се Обединетите нации, и поединечни земји – рече тој, без да прецизира кои земји.
Руски извор изјави за Ројтерс дека нацрт-заедничката изјава е испратена на одобрување до Москва и Вашингтон, а страните имаат намера да ја објават во вторник.