Администрацијата на американскиот претседател Доналд Трамп соопшти дека истражува дали Универзитетот Харвард и студентскиот весник на Правниот факултет на Харвард ги прекршиле законите за граѓански права кога уредниците на списанието го забрзале објавувањето на статија напишана од член на расно малцинство.
Веста за новата истрага дојде неколку часа откако федералниот судија се согласи да ја забрза тужбата на Универзитетот Харвард со која се бара да се блокира одлуката на администрацијата на Трамп за замрзнување на 2,3 милијарди долари федерално финансирање што ги загрозува клучните медицински и научни истражувања.
Во соопштението за истрагата од страна на американските министерства за образование и здравство и човечки услуги се вели дека уредниците на „Харвард леги ривју“ можеби прибегнале кон „расна дискриминација“ кршејќи ги одредбите од VI од Законот за граѓански права од 1964 година.
„Процесот на селекција на статии во „Харвард лег ревју“ се чини дека ги избира победниците и губитниците врз основа на расата, користејќи систем каде што расата на научникот е подеднакво важна, ако не и поважна, од квалитетот на објавената работа“, рече Крег Трејнор, вршител на должноста помошник-министер за образование за граѓански права.
Откако ја презеде функцијата, американскиот претседател Доналд Трамп ги заостри мерките против програмите за различност, еднаквост и инклузија, насочени кон подобрување на положбата на маргинализираните групи кои историски се соочувале со нееднаквост во Америка.
Трамп ги етикетира програмите насочени кон помагање на малцинствата како дискриминаторски кон групи како што се белците и мажите.
Универзитетот Харвард објави во понеделник дека ќе ја преименува својата Канцеларија за еднаквост, разновидност, инклузија и припадност во Канцеларија за живот во заедницата и кампусот.