Белата куќа денеска испрати писмо до членовите на Конгресот во кое ги повикува да ја одобрат продажбата на Lockheed Martin F-16 и комплетите за модернизација на Турција во вредност од 20 милијарди долари, објави Ројтерс, повикувајќи се на неименувани извори.
Турскиот парламент во вторникот ја ратификуваше кандидатурата на Шведска за членство во НАТО, отстранувајќи ја големата пречка за проширување на западната воена алијанса по 20 месеци одложувања.
Изворите велат дека писмото било испратено денеска и дека администрацијата во Вашингтон сè уште официјално не го известила Конгресот за плановите за продажба.
Одложувањето на ратификацијата на Турција беше главната пречка Конгресот да го одобри договорот за борбени авиони, пренесува Танјуг.
Конгресмените рекоа дека чекаат ратификација, вклучително и потпис на претседателот Реџеп Таип Ердоган, пред да одлучат дали да ја одобрат продажбата.
Во октомври 2021 година, Турција побара купување на борбени авиони Ф-16 на Локхид Мартин за 20 милијарди долари и речиси 80 комплети за модернизација за нејзините постоечки воени авиони.
Лидерите на Комитетот за надворешни работи на американскиот Сенат и Претставничкиот дом ја разгледуваат секоја голема странска продажба на оружје.
Тие редовно поставуваат прашања или изразуваат загриженост за човековите права или дипломатските прашања кои можат да ги одложат или запрат таквите договори.