Планинарскиот спортски клуб „Поларис“ од Куманово утре организира крводарителска акција во просториите на Општинската организација на Црвениот крст – Куманово.
Акцијата ќе се одржи од 10:00 до 15:00 часот, а се организира во соработка со Црвениот крст на град Куманово и Институтот за трансфузиона медицина.
Мотото на акцијата е „Бидете хумани како што сте упорни на планина“, со кое организаторите сакаат да ја поврзат планинарската традиција со хуманоста и доброволното дарување крв.
Од ПСК „Поларис“ ги повикуваат сите планинари, но и граѓаните од Куманово и другите градови кои сакаат да даруваат крв, да се приклучат на отворената крводарителска акција.
За учество е задолжително претходно пријавување на телефонскиот број 076 533 300.
Организаторите потсетуваат дека крв треба да даруваат само лица кои се здрави и подготвени за дарување.
Пред и по акцијата се препорачува зголемен внес на течности, додека по дарувањето треба да се избегнува потешка физичка активност и да се обезбеди одмор во наредните два до три дена.
„Срцето и крвта се богатство кое не се продава и не се купува, туку се дарува и подарува“, порачуваат организаторите.
Никола Ивановски