Францускиот претседател Емануел Макрон ги демантираше тврдењата дека американската разузнавачка служба (ЦИА) ја предупредила Франција за можна операција на руски дронови насочени кон јужна Европа.
Во заедничкото интервју што го емитуваа France 2 и TF1 во четвртокот, Макрон рече:
„Можеме да ја демантираме оваа информација. ЦИА не ја информираше Франција за ова и италијанскиот министер за одбрана го кажа истото“.
Шпанскиот дневен весник „Ел Мундо“ во четвртокот објави напис во кој се вели дека ЦИА предупредила неколку влади на јужна Европа за можна операција на руски беспилотни летала насочени кон Шпанија, Франција и Италија.
Италијанскиот министер за одбрана Гидо Крозето, исто така, ги негираше тие наводи во четвртокот.
На социјалната мрежа Х тој напиша дека „алармот што утрово го вклучи шпанскиот весник, кој шпекулира за можни напади на руски бродови и беспилотни летала врз Италија, Шпанија и Франција, никому не му користи и не е потврден“.
Зборувајќи за континуираната и засилена руска хибридна кампања против Европа, Макрон се осврна на нападот со беспилотни летала на аеродромот Лајпциг/Хале ноќта меѓу 4 и 5 август 2026 година, за кој германските власти и препишаа одговорност на Русија, пишува Euronews.com.
Макрон рече дека Франција сè уште не доживеала напад од слични размери, но предупреди дека таквото сценарио е можно.
„Кога ќе ме прашате: „Може ли да се случи??, мојот одговор е – да“, рече тој.
Францускиот претседател нагласи дека Русија ја смета „Европа за стратешко срце на Украина“, додавајќи дека можноста Русија да се обиде да изврши напад против Европа е „реална“.
„Јасно е дека има неколку знаци кои укажуваат дека Русија се подготвува за тоа“, рече тој.
Како што се зголемуваат шпекулациите за можните планови на Русија за нова мобилизација, Макрон рече дека мобилизацијата на околу 300.000 војници е „веројатно сценарио“ за кое „често се дискутира“.
Францускиот претседател смета дека тоа би било знак дека Москва е подготвена „да направи уште поголеми жртви за да го окупира целиот Донбас“. Тој оцени дека Русија, со сегашната стапка на напредок, треба
„Година и пол до две години“ да окупира територии во тој регион што сè уште не ги контролира, „со страшни загуби и страдања за Украина“.