Адилет, новоформираната провладина партија во Казахстан, освои нешто повеќе од 71 процент од гласовите на парламентарните избори одржани во неделата, објави денес изборната комисија, што веројатно дополнително ќе ја зајакне моќта на претседателот Касим-Џомарт Токаев, пренесува новинската агенција Ројтерс.
Адилет е основана на почетокот на оваа година во таа средноазиска земја, а ја водат најблиските соработници на Токаев.
Кратко по нејзиното основање, партијата ја вклучи во своите редови поранешната владејачка партија Аманат.
Покрај Адилет, изборната комисија објави дека во парламентот влегоа уште четири политички блока: пробизнис партиите Република и Ак Жол, Социјалдемократската партија од националната централно-лева ориентација и партијата Ауџил, која ги претставува гласачите од руралните средини.
Сите четири опозициски партии се сметаат за претежно наклонети кон владата на Токаев.
Агенцијата Бета синоќа објави дека три излезни анкети емитувани од државната телевизија покажуваат дека, без многу изненадување, владејачката партија во Казахстан победила на предвремените парламентарни избори во таа централноазиска земја каде што политичката сцена сè уште е доминирана од претседателот Касим-Џомарт Токаев.
Според синоќешните информации, партијата Адилет освоила помеѓу 70 и 72 проценти од гласовите, додека пет од седумте партии што имаа право да учествуваат на изборите ќе имаат претставници во парламентот.
Убедливата победа му гарантира на Адилет мнозинство во новиот еднодомен парламент од 145 места, кој беше воспоставен по уставната реформа во март.
Според изборната комисија, излезноста била 74,19 проценти, а на некои места дури и надминала 90 проценти, во земја со 20 милиони жители.
Овие предвремени избори се одржуваат по усвојувањето на новиот Устав, по референдумот одржан во март. На референдумот е одлучено да се укине Сенатот во корист на еднодомен парламент.
Врховниот суд на Казахстан во јули објави дека новиот Устав му дозволува на Токаев, кој ја презеде функцијата во 2019 година, да се кандидира за нов седумгодишен мандат.
На изборите учествуваа и неколку опозициски партии, кои сите се сметаат за во голема мера лојални на Токаев.
По гласањето во Астана денес, Токаев им рече на новинарите дека е прерано да се каже дали ќе се кандидира за уште еден мандат.
Токаев беше избран за наследник на првиот претседател на Казахстан, Нурсултан Назарбаев. Тој раскина со својот претходник по бранот немири во 2022 година, кои ги опиша како обид за државен удар од страна на сојузниците на Назарбаев.