Русија планира да распореди севернокорејска ракетна единица опремена со дури 120 балистички ракети и шест лансери во западниот дел на земјата, кои би можеле да се користат за нови напади врз Украина, според украинската воена разузнавачка служба.
Функционер на Главната разузнавачка дирекција на Украина, Андриј Черњак, изјави дека распоредувањето на севернокорејските ракетни сили веќе започнало и претставува ново проширување на воената соработка меѓу Москва и Пјонгјанг.
Според него, Русија планира да вклучи единица од околу 90 севернокорејски војници во составот на својата 112-та ракетна бригада во регионот Воронеж.
„Пјонгјанг веќе испорача нова серија од 40 балистички ракети КН-23 и КН-24, како и персонал што ќе биде распореден во Русија. Конечната конфигурација на распоредување и вкупниот број на ракети ќе бидат договорени за време на разговорите на високо ниво следниот месец“, рече Черњак.
Тој тврди дека Русија очекува распоредувањето да вклучува 120 севернокорејски балистички ракети и шест лансери, но дека во моментов е непознато каква точна улога ќе имаат севернокорејските војници во руските ракетни операции.
Черњак наведува дека оваа информација се совпаѓа со лансирањето на првите две севернокорејски балистички ракети кон цели во Украина минатата недела.
Ројтерс не можеше независно да ги потврди тврдењата, за кои украински функционер рече дека се засноваат на доверливи разузнавачки информации.
Воениот аналитичар Роб Ли од Американскиот институт за истражување на надворешната политика предупредува дека дополнителните севернокорејски ракети би претставувале сериозен проблем за Киев.
„Балистичката одбрана е една од најголемите слабости на Украина, па секое зголемување на бројот на балистички ракети со кои се соочува ќе претставува дополнителен предизвик“, рече Ли.
Тој додава дека претстојната зима би можела да предизвика посебна загриженост, кога Русија повторно би можела да започне масовни напади врз енергетската инфраструктура на Украина, како што правеше во претходните години.
Според украинските власти, од почетокот на руската инвазија, Северна Кореја стана еден од најважните воени сојузници на Москва.
Двете земји потпишаа договор за меѓусебна одбрана во 2024 година, додека Пјонгјанг ѝ испорача на Русија милиони артилериски гранати и испрати околу 14.000 војници во Курската област.
Черњак тврди дека во моментов има околу 9.500 севернокорејски војници во Курската област, но дека тие во моментов не се директно вклучени во борбени операции против Украина.
Украинскиот претседател Володимир Зеленски минатиот месец изјави дека Кремљ сака Северна Кореја да испрати уште 30.000 војници и дека Русија веќе ја подготвува инфраструктурата за нивно примање во Воронешката област.
Украински воени извори наведуваат дека севернокорејските ракети КН-23 и КН-24 имаат поголем дострел и можат да носат помоќни боеви глави од руските ракети „Искандер“, но дека се помалку прецизни и дека во претходните напади честопати предизвикувале голем број цивилни жртви.