Сојузниците на НАТО разговараа за предлог за забрзана програма за набавка на беспилотни летала во среда, неколку дена откако руски дрон се урна во станбена зграда во Романија, дознава Политико.
На затворен состанок на 32 амбасадори на земјите-членки на НАТО во Брисел, според изјавите на тројца дипломати, било дискутирано прашањето за итна набавка на беспилотни летала за мисии за воздушен надзор над граничните земји-членки.
Романскиот претседател Никушор Дан по состанокот изјави дека „било договорено да се забрзаат проектите на НАТО за одговор на заканите од беспилотни летала“, за да можат да се донесат соодветни мерки на претстојниот самит на алијансата во Анкара, закажан за 7 и 8 јули.
„Војната на Русија против Украина продолжува да создава сериозни ризици за евроатлантската безбедност, особено во Црното Море. Затоа, важно е НАТО да го зајакне своето присуство и капацитети во Романија“, истакна романскиот претседател.
Претходно планираниот состанок се одржа откако руски дрон се урна во станбена зграда во Романија кон крајот на минатиот месец, при што беа повредени две лица и Букурешт итно побара забрзана испорака на воздушна одбрана од НАТО.
Алијансата, исто така, распореди борбени авиони во последните недели за да соборуваат сомнителни беспилотни летала над Латвија и Естонија.
„Како директна последица од војната на Русија против Украина, сведоци сме на зголемен број инциденти со беспилотни летала по должината на нашето источно крило“, изјави портпаролката на НАТО, Алисон Харт.
НАТО има многу малку сопствени воени средства, бидејќи тие главно ги обезбедуваат националните влади.
Сепак, НАТО може да им помогне на земјите во стекнувањето на потребната воена опрема, која потоа се става под команда на врховните воени команданти на алијансата, според Политико.
На состанокот беа посочени и заканите за критичната инфраструктура на Црното Море, меѓу кои е романскиот проект за истражување на подводен гас „Нептун Дип“, вреден четири милијарди евра, кој треба да започне со работа следната година.
Исто така, беше разгледано прашањето дали воената команда на НАТО треба да го зголеми надзорот на воздушните и поморските беспилотни летала над тие објекти.
Националните воени претставници, кои се состанаа минатата недела во воената команда на алијансата во белгискиот град Монс, изразија отвореност за пренасочување на повеќе средства за воздушна одбрана за следење и елиминирање на беспилотни летала што летаат над Романија, пренесува Танјуг.