Полскиот премиер Доналд Туск изјави дека Русија би можела „за неколку месеци, а не години, да се обиде да нападне“ членка на НАТО, и затоа горливото прашање за Европската Унија е дали САД потоа ќе реагираат како лојален сојузник според Член 5 од Договорот за колективна одбрана на НАТО.
„Најголемото и најважното прашање за Европа е дали САД се подготвени да бидат лојални како што е опишано во нашиот договор (…). За целото источно крило, моите соседи, прашањето е дали НАТО е сè уште организација која е политички и логистички подготвена да реагира, на пример против Русија ако се обиде да нападне“, рече Туск во интервју за британскиот „Фајненшл тајмс“, објавија полските медиуми.
Туск апелираше до ЕУ итно да ја зајакне својата клаузула за колективна одбрана од Член 42 од Договорот за ЕУ, бидејќи може да се случи Русија „да не чека неколку години, туку да нападне една од членките за неколку месеци“.
„Навистина е сериозно. Зборувам за краткорочна перспектива, месеци, а не години. Исклучително е важно за нас да знаеме дека сите ќе ги сфатат сериозно обврските кон НАТО, како Полска. Вашингтон ја гледа Полска како најдобар и најблизок сојузник во Европа. Но, за мене, вистинскиот проблем е како изгледа во пракса ако нешто се случи“, рече Туск.
Полскиот премиер рече дека имал проблеми да ги убеди некои сојузници дека не можат да се однесуваат како ништо да не се случило кога Русија го наруши полскиот воздушен простор со повеќе од 20 дронови минатиот септември.
„Не ги убедив лесно нашите партнери во НАТО дека тоа не е случаен инцидент, туку добро испланирана и подготвена провокација против Полска. На некои од нашите колеги им беше полесно да се преправаат дека ништо не се случило. Затоа сакам да бидам сигурен дека ако нешто се случи, Русија ќе знае дека реакцијата ќе биде решителна и единствена“, рече Туск.
Полскиот премиер нагласи дека тоа не значи дека се сомнева во Член 5, дали е обврзувачки, туку дека „копнее гаранциите на хартија да се преведат во нешто попрактично“.