Унгарскиот претседател Тамаш Суљок треба да поднесе оставка по формирањето на новата влада, изјави лидерот на партијата Тиса, која победи на изборите во недела, Петер Маѓар, пред неговото пристигнување во претседателската резиденција во среда.
На пат кон средба со Суљок, Маѓар им рече на новинарите дека унгарскиот претседател мора да се повлече откако ќе се формира нова влада, објави Ројтерс.
Маѓар рече дека ќе го послуша она што претседателот има да го каже и ќе му ја пренесе „волјата на унгарскиот народ дека мора да ја напушти функцијата откако новата влада ќе дојде на власт“, објави унгарската новинска агенција МТИ.
Маѓар рече дека Суљок „не е способен да го отелотвори единството на унгарската нација, не е достоен да биде чувар на владеењето на правото во Унгарија и не е способен да служи како морален компас или модел за унгарскиот народ“.
Унгарскиот претседател го избира парламентот, а Суљок беше избран во февруари 2024 година.
По состанокот, тој им рече на новинарите дека го повикал претседателот доброволно да поднесе оставка, во спротивно ќе го промени уставот.
Сулјок одговори дека ќе ги разгледа аргументите на Маѓар, објави Ројтерс.
Маѓар, исто така, рече по состанокот дека Суљок му рекол дека ќе му даде мандат да формира влада и дека планира парламентарна седница на почетокот на мај.
Маѓар очекува новата влада да биде инаугурирана во текот на мај.