Унгарскиот министер за надворешни работи, Петер Сијарто, ја повика Европската Унија „веднаш“ да ја укине забраната за увоз на руска нафта и гас, тврдејќи дека Европа се соочува со уште еден голем удар врз цените на енергијата поради ескалацијата на војната на Блискиот Исток и затворањето на Ормутскиот теснец.
Во објава на X, Сијарто вели дека „голем дел од глобалното снабдување со енергија“ сега е загрозен, а дека Европа, според неговото толкување, е особено изложена бидејќи ЕУ веќе го забрани увозот на руска енергија.
Сега, тврди тој, глобалното снабдување е дополнително намалено поради конфликтот на Блискиот Исток, а кога снабдувањето се намалува, цените растат, па затоа на Европа ѝ се заканува „драматично зголемување на цените“.
Во исто време, унгарскиот министер директно го предупредува Брисел дека, доколку ги задржи санкциите, „сериозно ќе им наштети на европските луѓе и на европската економија“.
Тој заклучува дека европската политика мора да биде водена од заштитата на интересите на граѓаните, а не од „идеологијата“.
Сијарто претходно беше меѓу најгласните критичари на европските енергетски санкции против Русија, а во оваа публикација го поврзува својот аргумент со новата безбедносна и енергетска криза на Блискиот Исток, која во случај на долгорочно нарушување може дополнително да ги зголеми цените на нафтата и гасот.