Израелското Министерство за здравство соопшти дека им наредило на сите болници да одат на највисоко ниво на тревога и да се преселат во засолништа и подземни објекти поради заканата од потенцијален ирански напад.
Министерството за здравство на земјата објави дека амбулантата и незадолжителните медицински процедури се откажуваат, додека клиниките ќе вршат само итни процедури, како што е дијализата, објави „Тајмс оф Израел“.
Дополнително, сите пациенти на кои не им е потребна хоспитализација ќе бидат отпуштени и испратени дома или во установи за нега.
Се повикува јавноста да избегнува доаѓање во болници во неитни случаи.
Израелскиот министер за одбрана Израел Кац претходно изјави дека Израел извршил превентивен напад против Иран со цел да ги елиминира заканите за безбедноста на земјата и дека е прогласена вонредна состојба во целата земја, пренесува Танјуг.