Северна Кореја денес потврди тест-истрелување на систем од повеќе ракетни лансери со голем калибар, а лидерот Ким Џонг Ун изјави дека претстојниот конгрес на владејачката партија ќе ги претстави плановите за следната фаза на понатамошно зајакнување на нуклеарното одвраќање на земјата, објави државната новинска агенција КЦНА, пренесува Анадолу.
Ракетната администрација на Демократската народна Република Кореја (ДНРК) во вторник спроведе тест за да ја потврди ефикасноста на системот за ракетни лансери надграден со нова технологија.
Ким лично го надгледуваше лансирањето, во придружба на високи функционери.
За време на тестот, беа испукани четири ракети кои ја погодија целта во водите оддалечени 358,5 километри од местото на лансирање.
„Ја максимизиравме способноста за удар на системот“
Ким рече дека тестот е „од големо значење за подобрување на ефикасноста на нашето стратешко одвраќање“, тврдејќи дека техничките подобрувања ја максимизирале способноста за удар на системот.
„Сигурен сум дека ниедна друга земја не би стекнала таква технологија или не би поседувала такви капацитети барем уште неколку години“, рече тој, предупредувајќи дека резултатите би претставувале сериозна закана за силите што сакаат воен конфликт со Пјонгјанг.
Тој додаде дека следниот Конгрес на Работничката партија на Кореја ќе ги разјасни идните планови за понатамошно зајакнување на капацитетот на нацијата за одвраќање од нуклеарна војна, потврдувајќи дека градењето сигурни офанзивни капацитети останува клучна насока на националната одбранбена политика на партијата.
Во вторник, владите на Јапонија и Јужна Кореја објавија дека Северна Кореја испалила две балистички ракети кон Источното Море.
Лансирањата беа втори овој месец, по 4 јануари, кога јужнокорејскиот претседател Ли Џе Мјунг ја започна државната посета на Кина.