Намибиски политичар по име Адолф Хитлер е на пат да победи на локалните избори во својата татковина, но тврди дека неговиот татко немал поим за значењето на нацистичкиот лидер кога му го дал името на својот син.
Адолф Хитлер Уунона, 59-годишен политичар, е на пат да победи на уште едни локални избори во југозападната африканска земја Намибија на 26 ноември, задржувајќи го своето место на северот од земјата откако освои 85% од гласовите во 2020 година.
Членот на левичарската партија Свапо претходно зборуваше за своето озлогласено име откако доби глобално внимание со победата во изборната единица Омпунџа.
Неговиот татко „веројатно не разбирал што претставува Адолф Хитлер“.
„Како дете мислев дека е сосема нормално име“, изјави политичарот за германскиот весник Билд во 2020 година.
„Дури кога пораснав сфатив дека овој човек сакал да го освои целиот свет. Јас немам никаква врска со тоа“, додаде тој.
Сопругата на Унона го нарекува Адолф, но во јавноста обично го изоставува Хитлер. И покрај ова, тој инсистираше дека нема да го промени своето име.
„Тоа е во сите официјални документи. Премногу е доцна за тоа“, изјави тој за Билд.
Во 2020 година, автомобил со зборовите „Адолф Хитлер“ придружен со нацистичка свастика на задниот прозорец беше виден во родниот регион на Унона, Ошани.
Сепак, Унона тврдеше дека автомобилот не е негов и рече дека нема никаква врска со нередите.
Историја на односите меѓу Германија и Намибија
Помеѓу 1884 и 1915 година, Намибија беше дел од германската територија наречена Германска Југозападна Африка.
Германската империја уби илјадници луѓе за време на бунтот на локалните народи Нама, Хереро и Сан од 1904 до 1908 година, во она што некои историчари го нарекуваат „заборавен геноцид“.
Во 2021 година, Германија потпиша заедничка декларација со Намибија, во која беше признаена геноцидната природа на тие настани.
Во таа декларација, Германија се обврза да издвои околу 1,1 милијарда евра во текот на 30 години за програми за развој и реконструкција во Намибија, што треба да им користи на потомците на Хереро и Нама.
Сепак, Германија најчесто го нарече „гест на помирување“, а не формална „репарација“ и инсистираше дека не станува збор за правна компензација.
Многу претставници на заедниците Хереро и Нама веруваат дека договорот не е доволен – тие не се задоволни од износот, начинот на распределба на средствата или фактот дека заедниците не учествувале директно во преговорите.
По Првата светска војна, Намибија падна под контрола на Јужна Африка и доби независност во 1990 година.
Но, сè уште има мала германска заедница и многу градови со германски имиња.
Намибија има многу германски топоними, а традиционалните имиња како што е Адолфо не се невообичаени.